Fröhjoorserinnerungen to`n Pingstfest


Dat Wedder is grau, nattkoold. To`n Glück hebbt wi keen Ies und Snee. Kunst meist denken, wi sünd al in März, April. Ober bit dorhin is noch een ganze Tiet. As Kind, wenn Ostern vörbi weer, un dat güng op Pingsten to, hebbt wi uns jümmers bannig freit.

Dat weer so Mitte Mai, denn güngen uns Öllern mit uns beiden Jungs in de groote Stadt to`n inköpen. Kaufhaus Grimme in Rendsborg. Wi kreegen een niede Maibüx, kott. Dorto een Oberhemd mit kotte Arms, meistens weer dat witt. Poor niede Kneestrümp und een Poor lichte Sommerschoh, Sandalen oder so ähnlich. Dat weer ober blot för Sünndags und gliekermaten för Vogelscheeten, denn dat stünn jo ok bald an.

För normal harl`n wi een Ledderbüx, barfoot oder Sandalen. Dat weer ok good so, denn de Büxen de müssen örndlich wat utholen bi uns Jungs. Eerst wenn se richtig speckig weern, denn weern se good. Wenn ik so torüchdenken do, glöv ik, dat an Pingstwochenenn jümmers Ringrieden in Westerrönfeld weer. Een grodes, hüüt seggt man Event dorto. Dat ganze Dörp weer op de Been. Jaaa, kannst wull glöven, wi Jungs weern dor meernmang und hebbt uns an- keeken wo de stolten Rieders op eer Peer üm de Königswürde kämpft hebbt.

Fröher har`l jo meist jedeen Buur een bet twee Peer in Stall.

Een Johr, ik see dat richtig vör mi, Hans Markus Lüders weer König, unsen Nober. Buur Bock tweeter, Günter Wohlers drütter. Sandrieder, mit een Stuten üm Hals geev dat natürlich ok. Fiete Eggers. Sand-oder Stutenrieder is man woorn, wenn een vun Peerd flogen weer. Obends hett man de Königin afholt. Lisa Wohlers ut den Möhlendieken.

Bi Markus Lüders to Huus op de Deel hebbt se den Ehrendanz mookt. Füerwehrkapell vörweg. Loterhin güng dat af in Kroog. Mol bi Hans Clausen, mol bi Richard Wittorf. Jümmers afwesselnd, Johr för Johr.

För uns Jungs und Deerns weer dat een grotet Beleefnis. Wi hebbt dat op den Turnerplatz in de Hobenstraat naspeelt. Wi hebbt so doon, as seeten wi op een Peerd. Kannst glöven, mennichmol geev dat Striet, al wulln se König ween, keeneen Stutenrieder. Bi de Deerns weer dat jüst so. Ik mutt dat ingestohn, de Königsehre heff ik mi meistens nich nehmen loten.

Denn de Königin, jo, de weer dat ankieken weert. Wi hebbt, as de Grooten, sogor de Ehrentanz mookt. Op de Betonplatte vör dat Sprüttenhuus. To un to schön. Mi löpt meist een koolen Schuur över de Rüüg, wenn ik doran torüchdenken do.

Jungedi wat weern wi een Barg Jungs und Deerns de door jedeen Dag op den Turnerplatz speelt hebbt.

Und denn, Pingstsünndag kreegen wi dat erste mol uns niege Maibüx an, mit dat witte Hemd, de Kneestrümp, de lichten Sommerschoh. Utstaffeert as so`n Pingstoss, dovun kümmt de Nomen ja wull, güng dat af no Rendsborg in`t Kino. Elektra oder Schauburg dat weer egol. För uns weer dat wat besünneres. Föftig Penn Intritt, twee Grüschen to`n verleckern.

Jo, leeve Lüüd, to und to geern denk ik an düsse Kinnertied torüch.

Bet dorhin Jüm Klaus Woldt

Advertisements

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden /  Ändern )

Google+ Foto

Du kommentierst mit Deinem Google+-Konto. Abmelden /  Ändern )

Twitter-Bild

Du kommentierst mit Deinem Twitter-Konto. Abmelden /  Ändern )

Facebook-Foto

Du kommentierst mit Deinem Facebook-Konto. Abmelden /  Ändern )

w

Verbinde mit %s

%d Bloggern gefällt das: